Tashmë varianti britanik i koronavirusitr është mbizotërues në SHBA, e konfirmuar kjo nga autoritetet vendase. Sipas drejtoreshës së Qendrave për Parandalimin dhe Kontrollin e Sëmundjeve, Rochelle Walensky, kjo është një arsye kryesore përse infektimet po rriten. Ajo shpjegoi se ky variant është identifikuar tashmë në 52 rajone të vendit. Zyrtarët e shëndetit publik i kanë bërë thirrje banorëve të vaksinohen sa më shpejt që është e mundur, në mënyrë që të parandalojnë përhapjen e varianteve të reja. Shtetet e Bashkuara kanë identifikuar edhe raste të infektimit me variantin e zbuluar fillimisht në Afrikën Jugore, i cili besohet se u reziston vaksinave dhe trajtimeve për COVID-19, sëmundjen që shkakton koronavirusi. Ky variant është zbuluar në 36 shtete amerikane, sipas të dhënave federale. Shtetet e Bashkuara janë duke administruar 3 milionë vaksina në ditë kundër koronavirusit. Furnizimi me vaksina është rritur dukshëm në këtë vend javët e fundit, pasi kompania Johnson & Johnson ka nisur të prodhojë miliona doza të vaksinës tashmë të autorizuar. Kompanitë Pfizer/BioNTech dhe Moderna, po ashtu kanë shtuar kapacitetet prodhuese për vaksinat e tyre kundër këtij virusi. Presidenti amerikan Joe Biden synon dyfishimin e vaksinimit te 200 milionë personave gjatë 100 ditëve të tij të para në detyrë, por pavarësisht këtyre përpjekjeve, shifrat e infektimeve mbeten të konsiderueshme. Vetëm gjatë 7 diteve tëe fundit u regjistruan 63,000 raste të reja, një rritje kjo me 2.3 për qind krahasuar me një jave më pare.