Shtetet e Bashkuara të Amerikës kanë kryer sulme ajrore kundër grupeve të milicisë të mbështetur nga Irani në rajonin kufitar Irak-Siri. Sulmet e ushtrisë amerikane goditën objektet operative dhe të magazinimit të armëve në Irak,- tha Pentagoni në një deklaratë. Pentagoni nuk dha asnjë informacion mbi viktimat apo të plagosurit gjatë sulmit. Por një grup monitorimi raportoi se pesë luftëtarë të milicisë u vranë në Siri. Nga ana tjetër, Observatori Sirian për të Drejtat e Njeriut me seli në Mbretërinë e Bashkuar, tha se disa luftëtarë të tjerë u plagosën në një sulm nga aeroplanët luftarakë të SHBA. Agjencia shtetërore e lajmeve siriane Sana, raportoi se një fëmijë kishte vdekur dhe të paktën tre persona të tjerë ishin plagosur. Kjo është hera e dytë e sulmeve ajore që Presidenti Biden ka autorizuar kundër milicive të mbështetur nga Irani që nga marrja e detyrës në janar. Forcat amerikane të vendosura në Irak janë vënë në shënjestër disa herë gjatë muajve të fundit nga sulmet me dron. Rreth 2,500 trupa amerikane janë të vendosura në vend si pjesë e një koalicioni ndërkombëtar që lufton grupin xhihadist të Shtetit Islamik.