Ambasada e SHBA-së në Kiev mbetet e hapur, u njoftua në një deklaratë të enjten, duke mohuar kështu raportet për ndryshime në operacionet e selisë diplomatike të uashingtonit pas paralajmërimeve nga Rusia se diplomatët dhe të huajt duhet të largohen nga kryeqyteti ukrainas përpara se të përshkallëzohen sulmet. Disa media ukrainase cituan të enjten komentet e shefes së politikës së jashtme të Bashkimit Evropian Kaja Kallas se ambasada e SHBA-së ishte larguar nga kryeqyteti. Kallas u tha gazetarëve në margjinat e një takimi të BE-së në Qipro se të gjitha ambasadat e huaja në Kiev kishin injoruar kërcënimin e sulmeve nga Moska, përveç njërës. "Ajo që dëgjuam nga Ukraina ishte se të gjitha ambasadat qëndruan përveç njërës," tha Kallas të enjten. "Të gjithë evropianët qëndruan. Amerika u largua". Disa shtete të BE-së thirrën ambasadorët rusë për të dhënë sqarime pasi Moska lëshoi paralajmërimin e saj për të huajt që të largoheshin të hënën. Këshilltari i komunikimit i Presidentit ukrainas Volodymyr Zelenskiy, Dmytro Lytvyn, u tha gazetarëve se Ukraina kishte dëgjuar se disa diplomatë amerikanë ishin larguar nga Kievi në kohën e sulmit të fundit masiv rus të dielën. Ai shtoi se Ukraina ishte mirënjohëse ndaj të gjitha ambasadave që punojnë në Kiev dhe mbështesin Ukrainën. Një përfaqësues i ambasadës amerikane në Kiev nuk pranoi të komentonte deklaratat e tij. Ambasadorja në detyrë e SHBA-së në Kiev, Julie Davis, ishte në Lviv për një aktivitet në fundjavë, sipas postimit të ambasadës në mediat sociale.