Shtetet e Bashkuara të Amerikës, duket se kanë qenë të përgatitura për sulmin që Irani ndërmoari pasditen e së hënës mbi bazat amerikanë në disa shtete të Lindjes së Mesme. Kjo ka bërë që sulmi Iranian të mos shkaktonte viktima ndër personelin amerikan të këtyre bazave. Një zyrtar i lartë amerikan i tha BBC-së se Shtëpia e Bardhë dhe Departamenti i Mbrojtjes janë në dijeni dhe po i monitorojnë nga afër kërcënimet e mundshme ndaj Bazës Ajrore Al Udeid në Katar. “SHBA-të po gjurmojnë raketa të shumta të lëshuara nga Irani drejt bazave ushtarake amerikane në Katar dhe Irak”, thanë dy zyrtarë të njohur me çështjen. Nga ana tjetër Sekretari i Mbrojtjes Pete Hegseth dhe Kryetari i Shefave të Përbashkët të Shtabit të Ushtrisë, Dan Caine, janë në Dhomën e Situatave, sipas një zyrtari të Shtëpisë së Bardhë, dhoma nga ku u mor vendimi dhe nisi sulmi ndaj impianteve bërthamore të Iranit. Baza e Katarit u vizitua muajin e kaluar nga Trump, teksa baza në fjalë përbën instalimin më të madh ushtarak amerikan në Lindjen e Mesme. “Asnjë vizitë në Gjirin Persik nuk do të ishte e plotë pa u ndalur për të përshëndetur njerëzit që e mbajnë Amerikën të sigurt, të fortë dhe të lirë”, u tha Trump trupave në bazë më 17 maj.