Ushtria amerikane kreu një stërvitje mbi Karakas të shtunën, stërvitja e saj e parë ushtarake në Venezuelë që kur trupat amerikane sulmuan kryeqytetin dhe kapën Presidentin Nicolas Maduro dhe bashkëshorten e tij Cilia Flores më 3 janar. Autoritetet venezueliane thonë se sulmi vrau të paktën 100 persona. Stërvitja, të cilën qeveria venezueliane tha se e kishte autorizuar si një stërvitje evakuimi për urgjenca të mundshme mjekësore ose fatkeqësi, përfshinte dy avionë MV-22B Osprey që u ulën pranë ambasadës amerikane dhe anije që hynë në ujërat e Venezuelës në Detin e Karaibeve. Ambasada amerikane tha në një deklaratë se mbetet "e përkushtuar për të siguruar zbatimin" e planit me tre faza të Presidentit Donald Trump, "veçanërisht stabilizimin e Venezuelës". Administrata e Trump ka mbështetur qeverinë e Delcy Rodriguez, ish-nënpresidente e Maduros, e cila ka miratuar ligje për të hapur rezervat e mëdha të naftës dhe burimet minerare të Venezuelës për SHBA-në. “Kjo na mban në gatishmëri”, thotë Evelin Rebolledo, 57 vjec, një administratore që jeton në kryeqytetin venezuelë. “Një vend i huaj që fluturon mbi qytetin tonë, kjo është e re për ne dhe aq më tepër që vjen nga Shtetet e Bashkuara, duke pasur parasysh situatën aktuale dhe të gjitha trazirat në vend. Na lë në një gjendje pasigurie”, thotë ajo.