SHBA nuk beson se Vladimir Putin do të donte të luftonte përballë NATO-s, tha sekretari amerikan i mbrojtjes, Lloyd Austin ndërkohë që presidenti rus stërmundohet të arrijë qëllimet e tij në Ukrainë. Ai paraqiti këndvështrimin e tij para ligjvënësve në një seancë në kongres, në krah të shefit të shtabit të forcave të armatosura, gjeneralit mark Milley, që në anën tjetër tha se përdorimi i armëve hipersonike nga Rusia, nuk po rezultonte një ndryshues i rregullave të lojës. Në tre muaj pushtim rus të ukrainës, Moska këtë javë raportoi se kishte qëlluar me raketa hipersonike qytetin port të Odesës. Por, qëllimi i Putinit për të kapur Kievin dështoi dhe ai u detyrua ta përqendronte makinerinë e tij të luftës në rajonin lindor të Donbasit. Austin u pyet se cfarë do të ndodhte nëse Putin do të vendoste të sulmonte një vend anëtar të NATO-s. “Nëse shikoni përllogaritjet e putinit, mund të kuptoni se rusia nuk do të donte të përballej me aleancën e NATO-s. Ai ka një numër trupash në rajon aktualisht, në kufirin ukrainas. Ka disa edhe në Bjellorusi. Por në anën tjetër, ka 1.9 milionë trupa të NATO-s. Kjo e fundit ka kapacitetet më të avancuara se cdo aleancë tjetër në botë për sa i takon avionëve, municioneve e armatimeve. Ndaj, një luftë të tillë, ai nuk do të donte ta kishte”.