Pas gjashtë javësh heshtje, kancelari gjerman Olaf Scholz dhe presidenti rus Vladimir Putin kanë biseduar sërish në telefon. Scholz gjatë telefonatës, sipas informacioneve, ka kërkuar fundin e menjëhershëm të luftës në Ukrainë: "Sa më shpejt duhet të ketë një armëpushim në Ukrainë", deklaroi kancelari gjerman. "Hamendësimi se atje sundojnë nazistët, është i gabuar"- raportohet të ketë thënë ai. Scholz gjithashtu i ka tërhequr vëmendjen Putinit "për përgjegjsinë e Rusisë në situatën globale të ushqimeve". Një zëdhënës i qeverisë gjermane shtoi, se telefonata që ka zgjatur 75 minuta është zhvilluar të premten. Scholz i ka kërkuar presidentit rus përmirësimin e gjendjes humanitare dhe përparime në kërkim të një zgjidhjeje diplomatike të konfliktit. Agjencia ruse e lajmeve Tass më herët njoftoi, se Putini i kishte thënë Scholz-it në telefon, që bisedimet e paqes po bllokohen nga udhëheqja ukrainase në Kiev. Putin dhe Scholz kanë rënë dakord, që të vazhdojnë bisedimet në nivele të ndryshme për Ukrainën. Scholz ndërkohë foli për telefonatën me Putinin në komisionin e mbrojtjes në Bundestag. Kancelari bëri të qartë, se "qëllimi duhet të jetë rivendosja e integritetit territorial të Ukrainës" dhe jo "një paqe e ngrirë, gjatë së cilës Rusia të vazhdojë të mbajë territoret e pushtuara".