Rusia ka lëshuar qindra raketa dhe dronë ndaj kryeqytetit ukrainas, Kiev. Në mesin e shënjestrave të goditura është edhe rezidenca e ambasadorit shqiptar në Ukrainë, sipas ministrisë së jashtme shqiptare. Si pasojë e sulmit në Kiev, që është një ndër më të mëdhenjtë të kryer, janë vrarë të paktën dy persona, ndërsa numri i viktimave pritet të rritet. Ushtria ukrainase tha se të paktën 700 dornë dhe raketa u përdorën gjatë sulmit rus. Kryebashkiaku i Kievit, Vitali Klitshcko, tha se më shumë se 44 persona janë plagosur. Sulmi vjen pas paralajmërimeve të presidentit ukrainas, Volodymyr Zelenski, i cili tha se një sulm masiv mund të ndodhë, duke u bërë thirrje njerëzve që të strehoheshin. Raportime të pakonfirmuara thonë se Rusia mund të ketë përdorur raketën e re hipersonike, e aftë të bratë koka bërthamore, të quajtur Oreshnik. Nëse konfirmohen këto raportime, atëherë do të ishte hera e tretë që një raketë e tillë përdoret ndaj Ukrainës, dhe hera e parë që përdoret mbi Kiev. Shpërthimet tronditën Kievin menjëherë pas orës 1 të mëngjesit.