Rusia është akuzuar për terrorizëm bërthamor nga Ukraina pasi bombardoi një reaktor në qytetin e Kharkivit. Sulmi besohet se ka ndodhur në institutin e fizikës dhe teknologjisë në qytet, në një goditje të fundit, pasi i gjithë rajoni është vënë nën bombardime. Imazhe dramatike të shpërndara online tregonin shpërthimin që ndezi zjarre masive në ndërtesë. Sulmi shkaktoi po ashtu një zjarr edhe në një hotel aty pranë – thanë zyrtarët ukrainas. Anton Gerashcenko, këshilltar në ministrinë ukrainase të brendshme, tha se një mortajë kishte goditur një ndërtesë në të cilën ndodheshin pajisje që mund të lëshonin rrezatim bërthamor nëse do të dëmtoheshin. Sidoqoftë, sipas zyrës së presidentit, nuk ka patur asnjë ndryshim në nivelet aktuale të rrezatimit. Në një postim në tëitter, faqja zyrtare e parlamentit të ukrainës tha se luftimet afër institutit të fizikës dhe teknologjisë, vazhdonin. Qendra për komunikime strategjike dhe sigurinë e Informacionit tha ndërkohë se raportet nga dëshmitarët okularë flisnin për një zjarr në ndërtesën e institutit në Kharkiv.