Një anije rus ka hyrë në portin ukrainas të Mariupolit për herë të parë që kur trupat e Kremlinit pushtuan rajonin jugor. Sipas Sky neës, një zëdhënës i portit tha për agjensinë ruse të lajmeve TASS se anija do të ngarkonte 2700 ton metal përpara se të udhëtonte drejt lindjes në qytetin rus të Rostov-on-Don. Avokatja e popullit të Ukrainës për të drejtat e njeriut, Lyudmyla Denisova, ka thënë se marrja e metalit është një grabitje që bëhet haptazi nga Rusia. "Plaçkitja në territoret e okupuara përkohësisht të Ukrainës vazhdon. Pas vjedhjes së drithit ukrainas, pushtuesit iu drejtuan eksportit të produkteve metalike nga Mariupol"-tha ajo përmes Telegramit. Të premten, prodhuesi më i madh i çelikut në Ukrainë Metinvest tha se ishte i shqetësuar se Rusia mund të përdorë disa anije të bllokuara në Mariupol për të "vjedhur dhe kontrabanduar produkte metalurgjike" që i përkasin grupit.