Të paktën 18 persona kanë humbur jetën si pasojë e sulmeve ruse me raketa mbi një qendër tregtare në qytetin ukrainas Kremençuk në pasditen e së hënës. Rreth 60 persona janë plagosur, dhe rreth 36 të tjerë janë të zhdukur, ka thënë guvernatori rajonal, Dmytro Lunyn. Sipas tij, qendra tregtare është “shkatërruar plotësisht” nga sulmet. Autoritetet kanë thënë se rreth 1,000 persona kanë qenë brenda objektit kur ka ndodhur sulmi. Ukraina ka fajësuar Rusinë për sulmin, duke thënë se raketat ajër-tokë janë lëshuar nga bombarduesit në largësi, Tu-22. Rusia ka bombarduar edhe Harkivin, qytetin e dytë më të madh në Ukrainë, duke goditur objekte banimi si edhe një shkollë fillore, kanë thënë autoritetet.