Forcat ruse mund të jenë angazhuar këto orë në përgatitjen për një zbarkim nga deti në qytetin port të Ukrainës, Mariupol. Në një përditësim të situatës në terren, zëvendësministrja e mbrojtjes në ukrainë, Hanna Malyar, ka deklaruar se dikasteri i saj po verifikon informacione të ardhura në Kiev mbi përgatitjet e armikut për një operacion zbarkimi nga deti në qytetin e rrethuar. Më herët, ministria ruse e mbrojtjes i kishte dhënë mbrojtësve ukrainas, që duket se janë grupuar në zonën e Azovstalit, një impiant i stërmadh i prodhimit dhe përpunimit të celikut, një ultimatum: të dorëzoheshin nëse donin që të jetonin. Por pas skadimit të ultimatumit, vjen një mesazh i ri: Nëse do të vazhdoni të bëni rezistencë do të eleminoheni të gjithë. Kjo bëhet e ditur nga agjencia ruse e lajmeve Interfax e cila citon zëdhënësin e ministrisë ruse të mbrojtjes Igor Konashenkov. “Grupit, që është i rrethuar, i është propozuar të dorëzohen vullnetarisht për të shpëtuar jetët e tyre. por Kievi e ka ndaluar regjimentin Azov të negociojë dorëzimin”, ka shtuar Konashenkov.