Vijojnë të njohin rritje tensionet mes Truqisë dhe Greqisë, teksa së fundmi presidenti turk Rexhep Tayip Erdogan, ka bërë thirrje që grekët të mos votojnë më qeverinë aktuale. Në fjalën e tij në një akademi ushtarake, Erdogan përsëriti ankesat për shkelje të hapësirës ajrore nga Greqia, teksa theksoi se kjo e fundit duhet të vërë mend nga zhvillimet në rajon. “Është një realitet që fqinji ynë në Egje politikisht, ekonomikisht dhe ushtarakisht nuk është në të njëjtin nivel me ne. Prandaj në llogaritjet strategjike të Turqisë ka vendin e merituar. Shpresoj që populli grek do t’u japë mesazhin dhe mësimin nëpërmjet rrugës demokratike, pushtetarëve të tij që vrapojnë pas aventurave që do të sjellin një fund katastrofik për të”. I menjëhershëm ishte edhe reagimi nga qeveria greke, ku nëpërmjet zëdhënësit të saj Giannis Oikonomou, e konsideroi deklaratën e Erdogan si ndërhyrje në punët e brendshme. “Forcimi i vazhdueshëm i Greqisë ushtarakisht, diplomatikisht dhe ekonomikisht e trishton zotin Erdogan dhe e çon në deklarata që shkojnë përtej të zakonshmes. Grekët dhe greket kanë edukimin historik dhe patriotizmin që kërkohet për të mbajtur veshët hermetikisht të mbyllur ndaj nxitjeve të atyre që komplotojnë kundër atdheut të tyre”, tha zëdhënës i qeverisë. Teksa Samiti i NATO-s në Madrid u duk sikur uli tensionet mes dy vendeve, deklaratat e tyre të fundit vetëm sa i kanë rritur tensionet. Nga ana tjetër, si Turqia ashtu edhe Greqia kërkojnë të forcojnë flotat e tyre ajrore me avionë amerikanë.