Qiproja tha të hënën se do të ftojë armikun e saj të betuar, Turqinë, në një samit gjatë presidencës së saj të Bashkimit Evropian vitin e ardhshëm, pavarësisht një përçarjeje dhjetëvjeçare për pushtimin e vitit 1974 dhe mbështetjen nga Ankaraja të një shteti të shkëputur në ishullin e ndarë. Nikosia do të mbajë presidencën e rradhës të BE-së në gjashtë muajt e parë të vitit 2026 dhe planifikon një samit të liderëve rajonalë, ku do të jetë i përfshirë edhe Presidenti turk Tayyip Erdogan, e ku do të diskutohen cështje që lidhen me Lindjen e Mesme, tha Presidenti qipriot Nikos Christodoulides. "Nuk mund të ndryshojmë gjeografinë - Turqia do të jetë gjithmonë një shtet fqinj me Republikën e Qipros... Zoti Erdogan sigurisht që do të jetë i mirëpritur në këtë samit për të diskutuar zhvillimet në zonë", u tha ai gazetarëve. Christodoulides kishte thënë më herët të njëjtën gjë në një podcast të transmetuar të hënën duke theksuar se samiti ishte planifikuar të mbahej në prill 2026. Presidenca turke nuk i është përgjigjur ende ftesës. Qiproja dhe Turqia nuk kanë marrëdhënie diplomatike dhe pritja e një presidenti turk mund të jetë sfiduese si për shkak të tensionit diplomatik që rrjedh nga konfliktet e kaluara, ashtu edhe për shkak të çështjeve logjistike. Ishulli lindor i Mesdheut u nda nga një pushtim turk në vitin 1974, pas një grushti shteti të shkurtër, të frymëzuar nga Greqia, dhe Ankaraja mbështet një shtet të shkëputur dhe të panjohur nga vendet evropiane, në Qipron veriore, ku edhe mban mijëra trupa. Christodoulides kryeson një administratë greko-qipriote që përfaqëson të gjithë Qipron brenda BE-së, por me fuqitë e saj që ndalen në një vijë armëpushimi që ndan ishullin në pjesën veriore dhe jugore. Erdogan nuk e ka vizituar kurrë qipron e jugut.