Millorad Dodik, president i Aleancës së Socialdemokratëve të Pavarur (SNSD), dhe kryeministri i Republikës Sërpska, Savo Miniq, u takuan të martën në Moskë me presidentin e Rusisë, Vladimir Putin, pavarësisht izolimit ndërkombëtar të kreut të Kremlinit për shkak të luftës në Ukrainë. Takimi u zhvillua pesë ditë para zgjedhjeve të përgjithshme në Bosnje e Hercegovinë. Sipas Radiotelevizionit të Republikës Srpska (RTRS), Putini shprehu mbështetje për koalicionin qeverisës në këtë entitet serb, të udhëhequr nga Dodiku. “Ne nuk duam që ndikimi i huaj të jetë vendimtar. Duam një qasje më të drejtë ndaj serbëve dhe popullit serb. Duam stabilitet në të gjithë rajonin”, citohet të ketë thënë Putini, sipas RTRS-së. Ndërkaq, Dodiku, në një deklaratë të publikuar nga RTRS, propozoi që një herë në vit të organizohen mbledhje të përbashkëta të qeverive të Federatës Ruse dhe Republikës Sërpska, ndërsa tha se e kishte uruar Putinin për fitoren, shkruan Radio Evropa e Lirë. “Edhe ne ndiejmë trysni nga Brukseli, por politikat tona mbeten të njëjta. Ne nuk lejojmë sanksione ndaj Rusisë. Mbështesim neutralitetin ushtarak dhe nuk lejojmë anëtarësimin në NATO. Nuk do të ketë vendosje të vizave për shtetasit rusë në Bosnje e Hercegovinë”, tha Dodiku, i cili publikoi edhe një video nga takimi në profilin e tij në rrjetin social X.