Autoritetet e imponuara nga Moska në qytetin jugor të Khersonit, i pari i pushtuar nga trupat ruse gjatë pushtimit, thonë se planifikojnë t’i kërkojnë presidentit Vladimir Putin që rajoni të bashkohet me Rusinë. Rusia mund të planifikojë të mbajë një referendum që qyteti të shkëputet nga Ukraina, një votim që Kievi e përshkruan si të paligjshëm dhe të rremë. Rusia tashmë po prezanton monedhën e saj, shërbimet e medias dhe të internetit në Kherson, dhe pjesë të tjera të Ukrainës që ushtria e saj ka pushtuar. Por pse Rusia po përqendrohet në Kherson? Forcat ruse pushtuan Kherson në fillim të marsit, një javë pas fillimit të pushtimit të Ukrainës. Ishte qyteti i parë i madh që ra. Para pushtimit, kishte një popullsi prej 290,000 banorësh. Por, sipas ish-kryetarit të saj, rreth 40% e banorëve janë larguar që atëherë nga qyteti. Nëse Rusia synon të marrë Ukrainën jugore dhe të krijojë një urë tokësore për në Krime, Kherson, i cili ndodhet në bregun e Detit të Zi, do të jetë çelës.