Rusia ka kërcënuar hapur Ukrainën me ndërhyrje ushtarake pas përshkallëzimit të tensioneve ne rajonet kufitare në lindjen e vendit fqinj. Në rast ndezjeje të luftimeve, ne nuk kemi per të qëndruar duarkryq përpara një katastrofe të mundshme njerezore, deklaroi zëdhënësi i Kremlinit, Dmitri Peskov. Doktrina ushtarake e Rusisë e lejon ndërhyrjen në mbrojtje të qytetarëve rusë. Banorëve rusishtfolës të rajoneve Donjeck dhe Luhansk në Ukrainën Lindore, Moska i jep që nga viti 2019 mundësinë të marrin nënshtetësinë ruse, pavarësisht protestave ndërkombëtare. Më shumë se 400.000 qytetarë atje kanë ndërkohë një pasaportë ruse. Ushtria ukrainas nga ana e saj i hodhi poshtë akuzat, për përgatitje të mundshme të një sulmi kundër rajoneve separatiste proruse në lindje. Rimarrja e këtyre rajoneve „do të çonte në mënyrë të pashmangshme drejt vdekjes se një numri të madh civilesh dhe humbje të jetëve të ushtarëve" dhe është për këtë e papranueshme, deklaroi kreu i ushtrisë, Ruslan Chomtschak në Kiev. Në një intervistë në fund të marsit, ai qe shprehur, se presidenti Volodymyr Zelenskyj nuk ka problem që të japë urdhrin për një ofensivë. Tani nga Kievi bëhet e ditur, se ende Ukraina i jep prioritet zgjidhjes diplomatike të konfliktit, por prej ditësh palët po fajësojnë njëra-tjetrën për tensionimin e ri të konfliktit që zgjat prej 7 vjetësh, dhe kanë dërguar trupa në rajon, ku pavarësisht armëpushimit, përditë vriten njerëz në luftime sporadike.