Një avion Boeing 787-8 Dreamliner i Air India me destinacion Neë Delhi u kthye në vendin e nisjes, në Hong Kong, si masë paraprake të hënën, pasi piloti dyshoi për një problem teknik në ajër, tha një burim për agjencinë e lajmeve Reuters. Incidenti vjen disa ditë pasi një fluturim i Air Indias për në Londër, që përdorte të njëjtin lloj avioni Boeing, u rrëzua në qytetin perëndimor indian të Ahmedabadit pak çaste pas ngritjes, duke vrarë 241 nga 242 personat në bord. Avioni Dreamliner që fluturonte për llogari të Air India nga Hong Kongu të hënën tani po i nënshtrohet kontrolleve, tha burimi. Ai u kthye në Aeroportin Ndërkombëtar të Hong Kongut dhe kërkoi gatishmëri lokale rreth orës 13:00. Avioni u ul në mënyrë të sigurt rreth orës 13:15 minuta, tha zëdhënësi i Autoritetit të Aeroportit të Hong Kongut. Operacionet e aeroportit nuk u prekën, shtoi zëdhënësi. Fluturimi AI315 u nis nga Hong Kongu rreth orës 12:20. dhe u ul përsëri në të njëjtën pistë rreth një orë më vonë. Ai arriti në një lartësi prej 6700 metra dhe më pas filloi të zbriste. Avioni ishte prodhuar 7 vite më parë. Boeing dhe Air India nuk iu përgjigjën menjëherë një kërkese për koment mbi fluturimin Hong Kong-Nju Delhi. Aksidenti i javës së kaluar ka shfaqur një sfidë të re si për Air India, e cila prej vitesh është përpjekur të rinovojë flotën e saj, ashtu edhe për Boeing, që po përpiqet të rindërtojë besimin e publikut pas një sërë krizash sigurie dhe prodhimi.