Ndizen tensionet mes Romës dhe Moskës pas zbulimit të një operacioni të spiunazhit ushtarak, të përfunduar me arrestimin e një zyrtari të marinës ushtarake italiane, kapitenit të fregatës Valter Biot, dhe dëbimit të dy funksionarëve rusë me të cilët shkëmbente, përmes pagesave, dosje sekrete të ushtrisë dhe të NATO-s. Ministri i jashtëm Italian, Di Maio, tha se ky ishte një akt armiqësor ekstremisht i rëndë. Prokuroria ushtarake e Romës ka hapur zyrtarisht një dosje hetimi për arrestimin e zyrtarit italian dhe dëbimin e shtetasve rusë. Hipotezat janë dy: zbulim i sekreteve ushtarake dhe nxjerrjeve të lajmeve sekrete me qëllim spiunazhi. Tani ushtaraku italian rrezikon deri në 25 vite burg. Kapiteni i fregatës kishte patur akses në dokumenta të klasifikuara pasi ishte në shërbim në shtabin madhor të mbrojtjes. Shkëmbimi i dokumenteve, për 5 mijë euro ndodhi në një parking në kryeqytet atje ku edhe y bllokuan nga karabinierët. Të dy ata kishin rënë dakord për një shifër më të ulët, rreth 4 mijë euro, për dokumente të dhëna në të kaluarën. Ushtaraku italian akuzohet për nxjerrje lajmesh që cënojnë sigurinë e shtetit, spiunazh politik dhe ushtarak, shpërndarje lajmesh sekrete. Ai i kishte dhënë zyrtarit rus edhe dokumente të NATO-s. Ministria e jashtme bëri të ditur më pas se kishte thirrur ambasadorin rus për të dhënë shpjegime. Atij i është paraqitur protesta e qeverisë italiane dhe është informuar për dëbimin e menjëhershëm të dy funksionarëve rusë të përfshirë në këtë rast. Moska nga ana e saj ka kërcënuar se do të reagojë në mënyrë reciproke. Kremlini ndërkohë e ka quajtur xhest ekstrem atë të Romës dhe ka folur për një spio-mani.