Ashtu siç edhe e paralajmëroi, Gazment Bardhi depozitoi këtë të hënë në SPAK kërkesën për hetimin dhe ndjekjen penale ndaj kryeministrit Edi Rama, ministrit të shtetit për marrëdhëniet me parlamentin, Taulant Balla por dhe atij të jashtëm Igli Hasani si dhe ambasadorëve që u konstatuan, sipas tij, në takimet e kreut të qeverisë me diasporën. “sot kam depozituar në SPAK edhe kërkesën për hetimin dhe ndjekjen penale ndaj Edi Ramës, Taulant Ballës, Igli Hasanit, dhe Ambasadorëve të konstatuar, për kryerjen e veprës penale të parashikuar në nenin 328/a të Kodit Penal.|, shkroi Bardhi në platformën X ndërsa ndau dhe letrën drejtuar kreut të SPAK, ku thekson se trupa diplomatike nuk duhet të marrë pjesë në aktivitetet politike të PS. Ai thotë gjithashtu se I është drejtuar zyrtarisht dhe presidentit Bajram Begaj që të ndërhyj për të mos lejuar cënimim e rëndë të barazisë së palëve në zgjedhje dhe parimeve themelore që garantojnë zgjedhjet e lira dhe të ndershme. “Presidenti nuk duhet të hesht, por duhet të ngrihet në lartësinë e detyrës! Heshtja dhe mungesa e reagimit të Presidentit për veprimin kriminal të mazhoranës qeverisëse dhe Trupit Diplomatik, perceptohet si mesazh i qartë që ai e mbështet këtë aktivitet të paligjshëm, dhe mbi të gjitha mbështet shkrirjen në një të shtetit dhe partisë në zgjedhje.”, nënvizon kreu I grupit të PD.