Edhe NASA i ëhstë bashkuar kërkimeve dhe studimeve për të ashtuquajturat fenomene ajrore të paidentifikuara ose UFO. Agjencia hapësinore amerikane ka njoftuar se në vjeshtë do të nisë një hetim nëntë mujor, me 100 mijë dollarë financime. Përfundimet do të publikohen në një raport. Vendimi është marrë për ti dhënë një shpjegim shkencor vlerësimit të fenomenit për të cilin më herët janë interesuar edhe shërbimet e inteligjencës dhe kongresi amerikan. Hetimi do të kryhet nga ekspertë shkencorë me autoritet dhe ekspertë të aeronautikës. “Një nga rezultatet e këtij studimi do të jetë përfshirja e të gjithëve dhe procesi shkencor është i vlefshëm për të trajtuar të gjithë problemet, përfshirë edhe atë të UFO-ve”, ka shpjeguar në një konferencë për shtyp Thomas Zurbuchen, administrator i NASA-s. Objektivi është që të mblidhet numri më i madh i mundshëm i të dhënave, nga qeveri, sipërmarrje private, organizata, individë etj, të përcaktohen të dhënat që mungojnë dhe të vendoset se me cfarë instrumentesh do të bëhen analizat në të ardhmen.