SPAK i ka kërkuar Gjykatës së Posaçme kundër Korrupsionit dhe Krimit të Organizuar konfiskimin e pasurive të sipërmarrësit Ylli Ndroqit dhe kalimin e tyre për llogari të shtetit shqiptar. Bëhet fjalë për 32 pasuri, apartamente, aksione, pyje, troje, automjete dhe biznese. SPAK bën me dije se nga verifikimet e kryera u evidentuan fillimisht pasuri të luajtshme dhe të paluajtshme në pronësi të shtetasit Ylli Ndroqit dhe familjarëve të tij, për të cilat Gjykata vendosi sekuestrimin preventiv, në pritje të një vendimi të plotë tashmë me kërkesë të prokurorisë speciale. Në vijim u kryen verifikime të thelluara dhe rezultoi se u evidentuan dhe gjashtë pasuri të tjera të paluajtshme, truall dhe objekte me sipërfaqe totale 9232.8 m2 dhe vlerë rreth 1.6 milion euro të ndodhura në Tiranë. Bazuar në kërkesën e paraqitur nga Prokuroria e Posaçme, Gjykata e Posaçme e Shkallës së Parë për Korrupsionin dhe Krimin e Organizuar, vendosi sekuestrimin e tyre. Në përfundim të hetimeve pasurore u konkludua se ka një disbalancë mes të ardhurave dhe shpenzimeve të Ylli Ndroqit dhe familjarëve të tij, në çdo vit. Madje, sipas shifrave, bëhet fjalë për një diferencë prej 3 milionë euro, e cila rezulton e pajustifikuar.