Rusia ka paralajmëruar NATO-n se do të ishte e gatshme të përdorte armë bërthamore nëse aleanca perëndimore do të përpiqej të shkëpuste Kaliningradin, një enklavë ruse në Detin Baltik. Në një dokument të dërguar NATO-s, Moska e akuzoi aleancën për një "kurs të rrezikshëm dhe të pamatur", i cili mbartte "rreziqe të larta për shpërthimin e një konflikti të drejtpërdrejtë të armatosur". Dokumenti theksonte se kjo përfshinte mundësinë e "sulmeve ruse kundër qendrave vendimmarrëse në shtetet anëtare të aleancës, që në fillim të konfliktit". "Rusia do të jetë e gatshme të përdorë të gjithë arsenalin e forcave dhe kapaciteteve në dispozicion, përfshirë armët bërthamore, për të mbrojtur territorin e saj nëse vendet e NATO-s ndërmarrin ndonjë përpjekje për të izoluar rajonin e Kaliningradit nga pjesa tjetër e vendit," thuhej në tekstin që klasifikohet si "non-paper", një term diplomatik për dokumente joformale. Përveç këtij paralajmërimi privat, ambasadat ruse në të paktën tri vende evropiane kanë lëshuar deklarata gjatë tri ditëve të fundit, duke akuzuar NATO-n për përshkallëzim të tensioneve përmes stërvitjeve ushtarake dhe planifikimit të skenarëve që përfshijnë Kaliningradin. Deklaratat theksonin se Rusia nuk kishte ndërmend të sulmonte vendet e NATO-s, por paralajmëronin se çdo agresion kundër Kaliningradit, një territor rus i militarizuar rëndë, i vendosur midis Polonisë dhe Lituanisë, do të përballej me përgjigjen më të ashpër të mundshme.