Papa Françesku tha gjatë lutjeve të së dielës, se Mesdheu është bërë një nga "varrezat më të mëdha në Evropë", pasi kujtoi mijëra emigrantët që kanë humbur jetën në këtë rajon, duke u përpjekur të mbërrijnë në kontinent. Ai e ndërlidhi këtë çështje me një ceremoni që u zhvillua në Sicili për të përkujtuar tragjedinë e vitit 2015 kur rreth 800 migrantë që po shkonin nga Libia në Itali u mbytën pasi anija e tyre u fundos. "Kaq shumë tragjedi në Detin Mesdhe do të vazhdojnë të rëndojnë ndërgjegjen e të gjithëve", tha Papa. "Le të mendojmë për këtë: Mesdheu është bërë varreza më e madhe e Evropës", shtoi ai. Çdo vit, mijëra njerëz nga Afrika e Veriut nisen për në Evropë për një jetë më të mirë. Ata shpesh e bëjnë rrugëtimin me anije të mbingarkuara të drejtuara nga trafikuesit e qenieve njerëzore. Rasti më i fundit ishte të shtunën, kur disa anije mbërritën në ishullin e vogël të Lampeduzës në Itali. Mesdheu qendror është një nga rrugët më vdekjeprurëse të migrimit në botë. Më shumë se 500 njerëz kanë vdekur gjatë shkuarjes në Itali dhe Maltë midis janarit dhe majit të këtij viti, sipas Organizatës Ndërkombëtare të Migracionit.