Maqedonia e Veriut nisi dhe ajo vaksinimin masiv kundër koronavirusit. Imunizimi filloi me 24 mijë doza të vaksinës AstraZeneca, të cilat mbërritën të dielën në Shkup përmes programit COVAX të Organizatës Botërore të Shëndetësisë (OBSH). Vaksinimi po zhvillohet në Shkup dhe në nëntë qytete tjera. Të drejtën e vaksinimit në këtë fazë e kanë personat mbi moshën 77 vjec, të cilët për orarin e vaksinimit, njoftohen nga mjeku i familjes. Ministria e Shëndetësisë fillimisht kishte pohuar se nga këto doza, rreth katër mijë do të jepen për disa kategori tjera që janë të rrezikuar në vendet e punës duke përfshirë policë, ushtarakë, zjarrfikës, gazetarë, edukatore në kopshte, shofer autobusi dhe punonjës në gjyqe, por të martën në mbrëmje, ministri i Shëndetësisë, Venko Filipçe tha se vaksinimi me AstraZeneca do të bëhet vetëm për personat të moshës mbi 60 vjeç."Pas raporteve që morëm nga Kanadaja dhe Gjermania, ne vendosëm që të ndiqnim rekomandimet e tyre dhe të mos vaksinonim persona nën moshën 60 vjeç me Astra Zeneka. Sigurisht që nesër do të fillojmë të vaksinojmë qytetarë të moshuar, mbi moshën 77 vjeç”, tha Filipçe. Përmes vakcinacija.mk kanë aplikuar mbi 117 mijë qytetarë të interesuar për imunizim. 76,000 doza shtesë të vaksinës do të mbërrijnë në këtë vend deri në fund të prillit.