Rusia nuk po ndalet. Po qëllon me armë, tanke dhe avionë luftarakë, pikat strategjike, qyetete dhe karvane me emigrante në Ukrainë, duke shënuar një luftë më shumë se reale, e ku nuk mungojnë vrasjet e të pafajshme, pa llogaritur humbjet e mëdha në radhët e ushtarëve. Por, përveç luftës në terren, para syve të publikut po zhvillohet një tjetër luftë, edhe pse pa armë. Eshtë ajo luftë, që ndoshta duhet të kishte ndodhur, që atëherë kur Putin nisi me deklaratat e tij, ndonëse u menduan se ishin blof. Pra, lufta diplomatike ka nisur e ashpër, por deri më tani pa asnjë efekt. Të gjtihë liderët perëndimorë janë hedhur në betejë këtë fundjave, në një garë kundër kohës për të ndaluar luftën përpara se të dalë jashtë kufijve ukrainas, e të prekë shtete të tjera. Presidenti rus Vladimir Putin e ka mbyllur mbrëmjen e së shtunës me një takim me kryeministrin izraelit, i cili ishte dërguar nga SHBA në Moskë për të gjetur një zgjidhje me Putin. Nga ana tjetër, presidenti ukrainas e nisi ditën me një bisedë telefonike me presidentin amerikan Joe Biden me të cilin diskutoi për masat e ardhshme ndaj Putin, nëse nuk ndërronte kurs dhe lufta do të ketë pasoja edhe më të rënda se deri tani. Jo më pak luftë diplomatike po bën vetë Putin. Nga njëra anë kërkon të mos merren më sanksione, e nga ana tjetër telefon liderët e Evropës, siç ndodhi me homologun e tij francez Emmanuel Macron, bisedë që ka zgjatur më shumë se 45 minuta mes tyre, dhe ku kryefjalë ka qenë një armëpushim i shpejtë.