Bretanja nuk është rajoni më i nxehtë i Francës por temperaturat atje janë ngritur mbi 30 gradë. I gjithë vendi në fakt po përjeton një valë historike të nxehti, me rreziqe të mëdha. Banorët vendas dhe turistët e habitur kanë përjetuar tashmë netët e para tropikale të vitit, madje ende pafilluar vera. "Po sjellin shumë persona të moshuar që janë të dehidratuar”, thotë Katou Blaise, infermiere në urgjencën e spitalit universitar në Rennes. Edhe në qytetin perëndimor francez Nantes, shërbimi meteorologjik francez mati temperaturën 36 gradë, dukshëm më shumë se një ditë më parë, kur me 34,3 gradë u vendos një rekord i ri për muajin maj në këtë qytet. Rekordet e mëparshme për këtë periudhë po tejkalohen njëri pas tjetrit. Shërbimi shtetëror meteorologjik Météo-France konstatoi gjithashtu në nivel kombëtar se të hënën u regjistruan temperaturat më të larta ndonjëherë për muajin maj që nga fillimi i matjeve në Francë. Ekspertët thonë se ky është një episod i jashtëzakonshëm dhe i paprecedenttë. Ata theksojnë se këto nivele të nxehtësisë në këtë periudhë të vitit janë një pasojë e qartë e ndryshimeve klimatike. Para 30 apo 40 vitesh, temperatura të tilla në muajin maj nuk do të kishin qenë të mundshme. Por edhe shumë britanikë po përballen me temperatura rekord për majin ndërsa shërbimi meteorologjik i vendit paralajmëron se kjo është një dëshmi konkrete se si ndjehen efektet e ndryshimeve klimatike.