Dy shqiptarë të shpallur në kërkim ndërkombëtar si pasojë e precedentëve kriminalë janë kapur dhe ekstraduar drejt Shqipërisë. Operacionet disa vjeçare hetimore të Interpol Tiranës në bashkëpunim edhe me homologët italianë kanë mundësuar kapjen e Ardjan Hoxhajt dhe Arian Katrelit. Ardjan Hoxhaj, 49 vjeç është kapur në Romë të Italisë, nga ku autoritetet e kanë dërguar drejt vendit tonë. Hoxhaj në vitin 1995 ka goditur me thikë në kraharor një shtetas, i cili ka humbur jetën. Një tjetër vepër penale për të cilën akuzohet Ardjan Hoxhaj është edhe plagosja e vëllait të tij. Gjykata e Apelit të Vlorës e ka dënuar 49 vjeçarin me 16 vjet e 8 muaj burgim për veprën penale “Vrasje me dashje”, kryer në bashkëpunim. Ndërkohë Arian Katreli, 50 vjeç është kapur gjithashtu në Itali, nga ku është dërguar drejt vendit tonë. Për Katrelin, Gjykata e Rrethit Gjyqësor Durrës ka dhënë 10 vite burgim për veprën penale ‘Mashtrim’. Dy personat e ekstraduar në Pikën e Kalimit Kufitar Rinas i janë dorëzuar Drejtorisë së Përgjithshme të Burgjeve.