Mw pak se një minutë, nga dy kënde xhirimi, një nga brenda dhe një nga jashtë stacionit të mbërritjes. Janë këto, momentet e fundit tronditëse të jetës së katërmbëdhjetë viktimave të masakrës së teleferikut Stresa-Mottarone, e cila ndodhi më 23 maj, të fiksuara në një video që kaloi nga sekret hetimor, në material publik. Sekuencat, të marra nga kamerat e sigurisë të teleferikut, u transmetuan dje, ekskluzivisht, në edicionin e lajmeve të mesditës, në kanalin Rai 3. Ato lanë gjurmët e tyre, duke pasur parasysh ndikimin e lartë emocional, bënë xhiron e botës, dhe ngjallën polemika në lidhje me zgjedhjen gazetareske të bërë nga televizioni shtetëror. Prokurorja e Verbanias, Olimpia Bossi ndërhyri në këtë çështje me një njoftim zyrtar, sepse ato pamje, përtej implikimeve etike, nuk duhet të ishin bërë publike për arsye që lidhen me hetimin. “Është e vërtetë që veprimet e të dyshuarve nuk janë më të mbuluara nga sekreti, por është po aq e vërtetë, se xhirimet që janë objekt i polemikës lidhen me një procedim që i nënshtrohet hetimeve paraprake, një aspekt që i bën ato të papublikueshme, as plotësisht dhe as pjesërisht, siç përcaktohet nga neni 114 paragrafi 2 i kodit të procedurës penale,” tha prokurorja Bossi.