Deputeti italian Dario Carotenuto, dhe gazetari Alessandro Mantovani kanë rrëfyer momentet e dhunshme që pretendojnë se përjetuan pas ndalimit nga autoritetet izraelite gjatë misionit të flotiljes humanitare drejt Gazës. Pas mbërritjes në Itali, të dy deklaruan se janë goditur me shkelma dhe grushte, ndërsa aktivistë të tjerë, sipas tyre, janë trajtuar edhe më brutalisht. Gazetari tregoi shenja në fytyrë dhe trup, duke thënë se disa prej personave të ndaluar kishin lëndime shumë më të rënda. Deputeti rrëfeu se aktivistët mbaheshin me numra identifikimi dhe përshkroi momente frike e tensioni gjatë ndalimit, duke thënë se u futën në ambiente të errëta ku, sipas tij, ushtrohej dhunë fizike dhe kërcënime psikologjike.