52 oficerë burgu në Itali janë pezulluar pas dyshimeve për rrahjen e të burgosurve që protestonin për mungesën e maskave të fytyrës dhe testeve të virusit gjatë kulmit të pandemisë në Itali, vitin e kaluar. Videot e mbikqyrjes, të botuara nga gazeta “Il Domani”, tregojnë oficerët me shkopinj gome në duar, duke rrahur, shkelmuar dhe grushtuar të burgosurit. Disa të burgosur në burgun Santa Maria Capua Vetere në Napoli, u goditën në mënyrë të përsëritur ndërsa ishin në dysheme, të gjakosur, ose ndërsa ecnin me duart pas kokave të përkulura. Askush nuk u pa të rezistonte ose të kundërpërgjigjej. Ministria italiane e drejtësisë tha të mërkurën, se 52 oficerë dhe mbikëqyrës ishin pezulluar, në pritje të një hetimi penal për ngjarjet e 6 Prillit 2020. Ministrja e Drejtësisë Marta Cartabia, urdhëroi një hetim të plotë të brendshëm për atë që ndodhi. Ajo e quajti episodin një tradhëti ndaj kushtetutës italiane, "një shkelje të dinjitetit të të burgosurve", si dhe ndaj oficerëve që e bëjnë punën e tyre mirë. Prokuroria e shtetit hapi një hetim vitin e kaluar mbi këtë ngjarje, e cila e pati zanafillën pas një proteste të shkaktuar nga njoftimi i një rasti pozitiv të COVID-19 midis të burgosurve. Hetimi përfshiu më shumë se 110 persona. Këtu përfshihen kreu i policisë së burgut, dy komisionerë dhe tre inspektorë. Drejtori rajonal i administratës së burgut është pezulluar.