Makinat fluturuese do të jenë një realitet në qytetet anembanë globit deri në fund të kësaj dekade, sipas një prodhuesi kryesor të makinave, që do të ndihmojnë në pakësimin e trafikut dhe të ndotjes nga automjetet. Michael Cole, zyrtar i lartë i prodhuesit koreanojugor të makinave, Hyundai, tha se kompania ka bërë disa "investime shumë të rëndësishme" në fushën e transportit ajror urban, duke shtuar: "Ne besojmë se me të vërtetë është pjesë e së ardhmes, por duhet edhe pak kohë para se ta bëjmë realitet. Ne mendojmë se deri në pjesën e fundit të kësaj dekade sigurisht, transporti ajror urban do të ofrojë mundësi të shkëlqyeshme për të çliruar trafikun në qytete, për të ndihmuar me ndotjen, qoftë kjo lëvizje brenda qytetit apo edhe ndërmjet qyteteve". Kompania e shfaqi konceptin e saj të makinës fluturuese, të zhvilluar në bashkëpunim me kompaninë e shërbimeve taksi Uber, në Consumer Electronics Shoë në Las Vegas, në janar 2020. Hyundai është gjithashtu e përfshirë në projektin e aeroportit të parë pa pistë në Mbretërinë e Bashkuar, i projektuar për aeroplanë që janë të aftë për ngritje dhe ulje vertikale elektrike (eVTOL), i planifikuar të hapet në Coventry brenda këtij viti. "Aeroporti urban" mund të përdoret nga avionët, duke përfshirë edhe taksitë e ajrit dhe dronët e shërbimit postar.