Top News – Macron, linjë komunikimi me Putinin / Lideri perëndimor të cilit ‘Vladi’ ia hap telefonin

Ndërsa shumica e udhëheqësve botërorë po e mënjanojnë presidentin rus Vladimir Putin, një nga liderët e paktë që po mban një linjë të hapur komunikimi, është presidenti francez Emmanuel Macron. Përpjekjet diplomatike të Macron për të parandaluar luftën dështuan, por ai nuk po dorëzohet: të dy udhëheqësit kanë folur katër herë që kur forcat ruse sulmuan Ukrainën më 24 shkurt dhe 11 herë gjatë muajit të kaluar. Udhëheqësi francez, vendi i të cilit mban presidencën e rradhës të Bashkimit Evropian, është tani një nga të paktët të huaj që e ka kuptuar mendësinë e Putinit në kohën e pushtimit më të madh ushtarak në Evropë që nga Lufta e Dytë Botërore. Kryeministri izraelit Naftali Bennett po bëhet gjithashtu një ndërmjetës, duke takuar Putin në një vizitë të papritur në Moskë të shtunën dhe duke folur përsëri me të në telefon të dielën. Shtytja e vazhdueshme e presidentit Macron për dialog pasqyron traditën e Francës së pas Luftës së Dytë Botërore për të hartuar vetë rrugën gjeopolitike duke refuzuar të ndjekë verbërisht Shtetet e Bashkuara.