Presidenti i Francës, Emmanuel Macron i ka dërguar një letër urimi kryeministrit të Kosovës, Albin Kurti për formimin e qeverisë në ditën e marrjes së detyrës së kryeministrit. Me anë të letres që mban datën 23 mars, Macron i ka përmendur kryeministrit Kurti sfidën e madhe te dialogut me Serbinë, të cilën fituesi i zgjedhjeve parlamentare në Kosovë deklaroi që në fillim së nuk e kishte në mesin e prioriteteve të tij të para. Në mënyrë që ta diskutojnë këtë por edhe çështje të tjera, Macron e fton Kurtin për vizitë në Paris.“Unë e di që ju synoni të realizoni reforma thelbësore, të cilat i kërkojnë bashkeqytetaret tuaj: forcimin e shtetit të së drejtës si dhe zhvillimin ekonomik dhe shoqëror të Kosovës. Këtu sigurisht duhet shtuar edhe lufta kunder pandemisë, e cila ështe një përparësi e menjëhershme, në kohën kur Kosova po preket rëndë dhe kur Bashkimi Evropian po mobilizohet për të ndihmuar vendet e rajonit për të përballuar krizën shëndetësore dhe pasojat e saj. Unë dëshiroj t’ju siguroj për mbështetjen e Frances per të gjitha këto prioritete, për të miren e Kosovarëve dhe për afrimin vendit tuaj me Evropën”, shkruhet në letrën e presidentit francez. Por ai kujton aty se pavarësisht faktit që ka pasur disa arritje këto vitet e fundit në drejtim të dialogut me Serbinë, mbetet shumë për të bërë. Macron shpreh dëshirën që bisedimet të rifillojnë sa më shpejt, ndërsa i ofron mbështetjen e tij kryeministrit Kurti për të gjitha prioritetet në të mirë të kosovarëve.