Britania e madhe ka paralajmëruar shtetasit e saj të largohen urgjentisht nga rusia. Ministria e jashtme britanike më herët i kishte kërkuar qytetarëve britanikë të mos udhëtonin në vend, pasi fluturimet për në dhe nga rusia janë ndaluar. Tani, zyrtarët i kanë thënë britanikëve që mbeten në rus, të largohen menjëherë. E për ta bërë këtë, qytetarët britanikë nuk do të kenë në dispozicion asnjë fluturim direkt për në britani por do të duhet të ndjekin trajektore më të komplikuara përmes Lindjes së Mesme apo turqisë. Ndërkohë, kryeministri britanik, boris Johnson, tha se vendi do të lëvizë më shpejt për sa i takon sanksioneve mbi biznesmenët rusë. Ai tha se masa të reja ligjore do dërgohen në parlament javën e ardhshme. I pyetur se pse Roman Abramovich, biznesmeni rus i profilit më të lartë në Britani për shkak të pronësisë së tij të Klubit të Futbollit Chelsea, nuk ishte sanksionuar, Johnson tha se qeveria duhet të jetë e kujdesshme. “Nuk ka kuptim të thuhet, po, ne do të marrim masa ndaj tij, dhe më pas të përballemi me avokatët e tij. Kështu që ne duhet ta kuptojmë siç duhet. Ne gjithashtu po përpiqemi të mos e bëjmë këtë vetëm për një individ”, tha Johnson. Britania është kritikuar se nuk ka lëvizur aq shpejt me sanksionet kundër individëve siç ka bërë Bashkimi Evropian, Shtetet e Bashkuara dhe Kanadaja. Britania sanksionoi të enjten edhe dy rusë të tjerë - industrialistin Alisher Usmanov dhe ish-zëvendëskryeministrin Igor Shuvalov. Abramovich tha të mërkurën se do të shesë klubin e futbollit Chelsea dhe premtoi se paratë nga shtija do t’i dhurojë për të ndihmuar viktimat e luftës në Ukrainë.