Kryeministri i Kosovës, Albin Kurti është nisur për në Bruksel për takimin e ditës së nesërme mes tij dhe presidentit serb, Aleksandër Vuçiç. Përmes një postimi në rrjetet sociale, zëdhënësi i Qeverisë së Kosovës, Përparim Kryeziu ka thënë se takimi i nesërm nuk është takim i dialogut, por përgatitje për axhendën e tij. Sipas tij në këtë takim Kurti do të paraqesë vizionin dhe qëndrimet e tij dhe të Qeverisë së Kosovës të cilat do të jenë parimore dhe të drejta. “Siç kemi thënë në vazhdimësi, takimi i nesërm nuk është takim i dialogut, por takim për dialogun, për dialogun e ardhshëm. Aty kryeministri Kurti do të paraqesë vizionin dhe qëndrimet tij dhe Qeverisë së Republikës së Kosovës për të, e i cili duhet të jetë parimor dhe i drejtë, në shërbim të popujve të dy vendeve dhe i shkëputur nga ai i kaluari. Pra nga takimi synohet dakordim rreth kapitullit të ardhshëm të dialogut dhe agjendës së tij, pas diskutimeve shterruese të ditës së premte në Kuvendin e Republikës së Kosovës për dialogun e mëparshëm dhe dëmet e shkaktuara nga ai”, shkruan zëdhënësi i Qeverisë së Kosovës, Përparim Kryeziu.