Organizata e Reporterëve pa Kufij e përfshiu kryeministrin e Hungarisë, Viktor Orban, në listën e saj vjetore të “armiqve të lirisë së shtypit”. Është hera e parë që kryetari i një qeverie të BE shfaqet në këtë listë, së bashku me udhëheqësin e Koresë së Veriut, Kim Jong-un, presidentin e Sirisë, Bashar Al-Assad, e të tjerë. Vëzhguesi i mediave tha se Orban dhe partia e tij Fidesz “e kanë sjellë peisazhin mediatik të Hungarisë, hap pas hapi, nën kontrollin e tyre”, qëkur kanë marrë pushtetin në vitin 2010. Grupi tha se Orban i shënjestroi mediat me mjete të tilla si “mashtrimet politiko-ekonomike, diskreditimi dhe autocensura”. Sipas Reporterëve pa Kufij, shtypi rajonal i Hungarisë ka qenë plotësisht në pronësi të sipërmarrësve që janë miq me Orbanin, që nga vera e vitit 2017. “Në vjeshtën e vitit 2018, gati 500 kompani mediatike pro-qeveritare janë bashkuar në një kompani, për të koordinuar mbulimin e tyre”, thanë Reporterët pa Kufij. Në Indeksin e Lirisë së Shtypit, të përpiluar nga Reporterët pa Kufij këtë vit, Hungaria është renditur e 92-ta në mesin e 180 vendeve. Lista e “armiqve të lirisë së shtypit” përfshin 37 udhëheqës të shteteve dhe qeverive që shtypin lirinë e mediave. Lista përfshin udhëheqësin suprem të Iranit, Ajatollah Ali Khamenei, presidentin rus, Vladimir Putin, Aleksandër Lukashenkon e Bjellorusisë, Ramzan Kadyrovin e Çeçenisë, Emomali Rahmonin e Taxhikistanit dhe Gurbanguly Berdymukhammedovin e Turkmenistanit.