Pas disa përplasjeve diplomatike mes Kroacisë dhe Serbisë, të dielën, pas lajmit se presidenti Vuçiç do të shkonte në Jasenovac në një vizitë private, mediat serbe shkruajnë këtë të hënë se gjithcka duket se është sheshuar. Sipas tyre, autoritetet kroate janë shprehur se ato nuk janë kundër vizitës së Vuçiçit në Jasenovac por duan që vizita të bëhet zyrtare dhe për këtë kanë vendosur dy kushte. Kushti i parë është që për cdo detaj të arrihet dakordësi në nivel diplomatik dhe të njoftohen autoritetet përkatëse. Kushti i dytë është që vizita të mos bëhet deri në vjeshtë. "Kroacia do të lejojë ardhjen e presidentit Aleksandër Vuçiç në Jasenovac, por kjo është dicka për të cilën duhet të bihet dakord përmes kanaleve diplomatike. Presidenti serb, Aleksander Vucic, nuk kishte vepruar kështu por kishte njoftuar vetëm Milorad Pupovac duke i thënë se ai dëshironte të shkonte në Pakrac dhe Jasenovac. Nuk kemi asgjë kundër ardhjes së tij, por, është e nevojshme të bihet dakord paraprakisht për vizitën që megjithatë nuk do të mund të realizohet para vjeshtës”, tha një burim i afërt me qeverinë kroate. Presidenti serb të dielën tentoi të hynte në territor kroat pa u konsultuar me autoritetet, dhe qëllimi i tij ishte që të shkonte në Jasenovac, një vend ku Beogradi pretendon se janë kryer krime ndaj serbëve gjatë Luftës së Dytë Botërore.