Policia britanike e anti terrorit, e cila po heton një komplot të dyshuar që përfshin një bazë ajrore të përdorur nga SHBA-ja për operacione kundër Iranit, njoftoi të enjten se ka arrestuar një shtetas me kombësi të dyfishtë britaniko-iraniane, nën dyshimin për përgatitjen e akteve terroriste. Në një incident që shkaktoi një reagim të gjerë policor, ngjalli shqetësim te aleatët perëndimorë dhe mbetet kryesisht i pashpjeguar, pesë burra britanikë rreth të njëzetave u arrestuan të dielën pranë bazës RAF Fairford në Anglinë perëndimore, nën dyshimet për terrorizëm dhe vepra penale që lidhen me lëndë shpërthyese. Burrat u liruan më vonë pa akuza, në pritje të hetimeve të mëtejshme. Megjithatë, policia kundër terrorizmit deklaroi se po shqyrtonte mundësinë e përfshirjes së një shteti të huaj në incident, ndërsa kryeministri Andy Burnham tha të mërkurën se ngjarja mund të kishte lidhje me Iranin. Irani i ka cilësuar si të pabaza akuzat për përfshirjen e tij dhe të enjten thirri ambasadorin britanik në Teheran lidhur me këtë çështje. Në zhvillimin më të fundit, policia njoftoi se kishte arrestuar në Londër 25-vjeçarin me shtetësi të dyfishtë. Policia nisi një operacion të gjerë në orët e para të së dielës "për shkak të një sërë informacionesh", përfshirë një njoftim nga një fermere vendase, e cila u bë dyshuese ndaj disa personave që kishte parë pranë bazës me tre furgonë. Megjithatë, gazeta "The Times" raportoi se njëri prej këtyre personave kishte telefonuar shërbimet e urgjencës pak para se të arrestohej.