Udhëheqësi i Koresë së Veriut, Kim Jong Un, tha se dështimi për të zbatuar masat kundër koronavirusit, ka shkaktuar “krizë të madhe”. Agjencia shtetërore e lajmeve KCNA tha se Kim i ka ndëshkuar disa zyrtarë të partisë në pushtet, për "rrezikimin e sigurisë së vendit dhe të njerëzve".Raporti i KCNA-së nuk dha hollësi për natyrën e krizës. KCNA po ashtu nuk specifikoi nëse shkarkimi i disa zyrtarëve të partisë ka të bëjë me neglizhencën ndaj detyrave që lidhen me pandeminë. Koreja e Veriut nuk ka konfirmuar zyrtarisht asnjë rast me koronavirus - gjë që është vënë në dyshim nga ekspertët ndërkombëtarë të shëndetësisë. Por, vendi komunist ka ndërmarrë masa të rrepta kundër koronavirusit, duke mbyllur kufijtë dhe ndaluar udhëtimet e brendshme. Për pasojë ka rënë edhe tregtia me Kinën. Koreja e Veriut varet nga Kina për ushqime dhe karburante. Ky vend përballet me vështirësi edhe si pasojë e sanksioneve ndërkombëtare, të vendosura për shkak të programit të tij bërthamor. Ditë më parë, Kim ka pranuar se situata me ushqime në vendin e tij është rënduar dhe u ka bërë thirrje qytetarëve që të përgatiten për “më të keqen”. Ai e ka krahasuar situatën me urinë vdekjeprurëse në Korenë e Veriut, në vitet 1990. Numri total i verikoreanëve që kanë vdekur atëbotë nga uria, nuk dihet saktë, por besohet të ketë qenë rreth 3 milionë.