Kim jong un i ka dërguar një letër urimi mbretëreshës Elizabetë me rastin e 70 viteve të saj në fron. Diktatori koreano verior, dërgoi një mesazh deri diku misterioz për madhërinë e saj dhe lajmi është konfirmuar nga ministria e jashtme e vendit. Sidoqoftë, zyrtarët nuk pranuan të tregonin përmbajtjen e letrës duke thënë se ai ishte një mesazh privat që i drejtohej monarkes 96 vjecare. Një zëdhënës i Pallatit të Bakingamit ndërkohë tha se bëhej fjalë për një mesazh privat nga Kim Jong un për madhërinë e saj që ishte në linjë me praktikën standarte të marrjes së mesazheve nga vendet me të cilët monarkia ka marrëdhënie diplomatike. Dhe kjo nuk është hera e parë që mbretëresha dhe Kim jong un, të dy me pushtet të trashëguar nga etërit, kontaktojnë me njëri tjetrin. Në shtator të vitit të kaluar, mbretëresha i dërgoi Kim Jong Unit urime në ditën kombëtare të vendit. “Ndërsa njerëzit e republikës popullore demokratike të koresë, festojnë ditën e tyre kombëtare, unë i uroj më të mirën për të ardhmen”, shkruhej në urim. Komunikimi më i fundit i diktatorit koreano verior me monarken vjen ndërsa e gjithë bota po e uron atë. Mbretëresha është e para monarke britanike që feston një jubile të platintë dhe britania e madhe ka shpallur katër ditë festë në nder të saj.