Kryebashkiaku Erion Veliaj këtë të premte priti në zyrën e tij Kristian Prengën, boksierin shqiptar që u shpall kampin bote, pasi mundi boksierin amerikan, Samuel Crossed dhe fitoi titullin NAB-North American Belt. Veliaj u shpreh krenar për suksesin e Prengën dhe u shpreh se ai është frymëzim për djemtë e vajzat në të gjithë Shqipërinë e jo vetëm. Boksieri mori medaljen e Mirënjohjes së Qytetit, vlerësim të cilin ia dha Veliaj. “Është një kënaqësi e jashtëzakonshme sot, që një shok, vëlla, mik, Kristian Prenga kthehet në Tiranë si kampion bote! Të jam shumë mirënjohës për punën që ke bërë. Ndonjëherë, ne investohemi kaq shumë në promocion të qytetit, të vendit, në ambasada, në diplomaci, në marketing, por shpesh herë harrojmë se marketingu më i mirë janë historitë njerëzore të çunave e gocave që janë rritur me vështirësi, në familje të mëdha, në periferitë e vendit tonë, ama ia kanë dalë me sukses, fillimisht në vend, pastaj në Europë, tani në Kanada, e më së fundmi në Amerikë. Ti e ke nisur nga Oroshi dhe sot je kampion bote. Jam vërtet shumë krenar për ty! Je frymëzim për djemtë e vajzat në të gjithë Shqipërinë, por edhe jashtë Shqipërisë. Shpresoj shumë që të vazhdosh të mbetesh fillimisht një çun i mirë, më pas edhe një sportist i mirë,”.