Presidenti i SHBA-së, Joe Biden nisi këtë të mërkurë, udhëtimin e tij të parë në Lindjen e Mesme që nga marrja e detyrës, me Iranin në krye të agjendës në vizitat e tij me aleatët e SHBA-së, Izraelin dhe Arabinë Saudite, të dy rivalë të ashpër të Republikës Islamike. Udhëtimi do të ketë një ndalesë tre-ditore në Izrael për të diskutuar negociatat e fuqive perëndimore me Iranin për ringjalljen e marrëveshjes bërthamore të vitit 2015. Biden, i cili ishte zëvendëspresident nën udhëheqjen e Barack Obamës kur u arrit marrëveshja fillestare, e ka bërë rikthimin në jetë të saj një prioritet të presidencës së tij. Biden do të qëndrojë dy ditë në Jerusalem për bisedime me udhëheqësit izraelitë dhe më pas do të takohet me presidentin palestinez, Mahmud Abbas në Bregun Perëndimor të pushtuar. Biden do të shkojë më pas në Arabinë Saudite, ku pritet të bëjë presion për normalizimin e mëtejshëm të marrëdhënieve midis Izraelit dhe sauditëve – armiq historikë, por që të dy kundërshtojnë gjithashtu lëvizjet e Iranit për të rritur ndikimin në rajon.