Miliarderi Jeff Bezos është nisur të martën drejt Hapësirës, duke realizuar fluturimin e parë me ekuipazh në anijen raketë të kompanisë së tij, “Blue Origin”. Ai është nisur nën shoqërinë e vëllait të tij, Mark Bezos, 83-vjeçares Wally Funk, dhe një studenti 18-vjeçar. Ata janë duke udhëtuar në pajisjen me dritaret më të mëdha që është nisur ndonjëherë në hapësirë, duke ofruar kështu pamje mahnitëse të Tokës. Anija raketë e krijuar nga kompania e Bezosit, “Blue Origin”, është dizajnuar për të krijuar treg për turizëm në hapësirë. Raketa u nis të martën nga një zonë private në Teksas. Para nisjes, Bezos tha për mediat, se është shumë entuziast. “Njerëzit më pyesin nëse jam nervoz. Në fakt nuk jam. Jam kurioz. Dua të shoh se çfarë mund të mësojmë”, tha ai. Ndërkohë, miliarderi tjetër, shefi I kompanisë “Virgin Galactic”, Richard Branson, I cili e realizoi udhëtimin e vet në hapësirë më datë 11 korrik, e përgëzoi kolegun e tij me anë të një mesazhi në Twitter: “Ju lumtë Blue Origin, Jeff Bezos, Mark, Wally dhe Oliver. Mbresëlënëse! Gjithë të mirat ekipit tuaj, nga unë dhe gjithë skuadra e Virgin Galactic,” shkruan Branson. Bezos, shef i Amazonit, kompanisë së shitjeve online, është aktualisht njeriu më i pasur në botë. Sipas revistës amerikane Forbes, pasuria e tij neto kap vlerën e 186.2 miliardë dollarëve.