Italia njoftoi masa të reja kundër COVID 19 pasi infeksionet filluan të rriten përsëri, kryesisht për shkak të variantit Delta. Numri i infeksioneve të reja me koronavirus u dyfishua javën e kaluar. Italia tani regjistron çdo ditë më shumë se 5,000 raste të reja. Mes shqetësimeve se numri do të vazhdojë të rritet, Kryeministri Italian Mario Draghi përcaktoi rregulla të reja që do të hyjnë në fuqi më 6 gusht dhe do të vazhdojnë deri më 31 dhjetor. Kryeministri Draghi tha se e ashtuquajtura pasaporta e gjelbër do të kërkohet në Itali për shumë shërbime, përfshirë argëtimin dhe kohën e lirë. Pasaporta e gjelbër është karta që tregon se një individ ka marrë të paktën një dozë vaksine, ka dalë negativ në 48 orët e fundit ose është shëruar nga koronavirusi. Rregullat e bëjnë Pasaportën e gjelbër të nevojshme për të ngrënë në restorante dhe bare dhe për të marrë pjesë në ngjarje sportive, në muze, kinema, panaire dhe takime. Ministri i Shëndetësisë Roberto Speranza tha se 40 milionë italianë kanë tashmë Pasaportën e gjelbër, duke shtuar se vaksinimi është mënyra më e mire për të "tejkaluar sezonin më të vështirë me të cilin na është dashur të përballemi".Qeveria do të zhvillojë diskutime të mëtejshme në fillim të javës së ardhshme për të vendosur nëse pasaporta e gjelbër do të kërkohet për të përdorur transportin publik, në shkollë dhe në vendet e punës.