Pas reagimit të Katarit, i cili theksoi se rezervon të drejtën për t’u kundërpërgjigjur pas sulmit iranian mbi bazën amerikane në Doha, ka reaguar edhe vetë Teherani zyrtar. Në një deklaratë të mbrëmjes së të hënës, Irani e konsideron Katarin si një shtet vëllazëror e mik, teksa thekson se sulmi nuk ka cenuar popullin e tij, por bazën amerikane. Deklarata erdhi nga Këshilli i Sigurisë së Iranit ku theksohet se “forcat e armatosura iraniane kanë ndërmarrë sulme ndaj bazës amerikane në Katar, si hakmarrje për sulmin agresiv dhe të pafytyrë të Shteteve të Bashkuara ndaj objekteve tona bërthamore”. “Baza amerikane ndodhet larg zonave urbane dhe banimit në Katar,” thuhet në deklaratë, duke shtuar se “ky veprim nuk ka rrezikuar vendin mik dhe vëllazëror të Katarit dhe popullin e tij fisnik, dhe se Irani mbetet i angazhuar për të ruajtur dhe forcuar lidhjet e ngrohta e historike me Katarin”.