Kryebashkiaku i Elbasanit Gledian Llatja zhvilloi një takim me banorët e fshatit Kyçyk nga ku u shpreh se zona e Treganit, me të gjithë fshatrat e saj, është një nga potencialet më të mëdha të turizmit kurativ që ka Bashkia e Elbasanit dhe si e tillë do të jetë fokusi i vëmendjes dhe në 4-vjeçarin e ardhshëm. Llatja: “Ne sot po bëhemi gati për garën tonë elektorale, një garë në të cilën ne shkojmë të bindur drejt fitores, drejt mandatit të ri, për të ecur përpara edhe 4 vite të tjera në zbatimin e programit tonë që kemi për ndryshimin e Elbasanit. Ne do të fillojmë shumë shpejt me rrugën që lidh dy llixhat, llixhat lart dhe llixhat poshtë. Do të fillojmë rrugën që lidh hotelet dhe të shkurtohet distanca ndërmjet dy llixhave edhe për këmbësorët, por edhe për turistët që vijnë. Ne do vazhdojmë me mbështetjen tuaj në të gjitha fshatrat. Por kryesisht atje ku kemi një potencial të lartë turistik. Zona e llixhës është dhe do të mbetet një nga zonat kryesore për mbështetje në infrastrukturë dhe mbështetje në zhvillim”.