Parashikimi i tërmeteve ka qenë gjithmonë sfida më e vështirë, dhe deri më tani e pamundur. Dekada të tëra kërkimesh të rëndësishme ndërkombëtare nuk kanë mundur të zbulojnë sinjalet që tregojnë se sa dhe kur një tërmet mund të jetë shkatërrues. Aktualisht, tërmetet thjesht nuk mund të parashikohen. Por, kjo mund të ndryshojë dhe ndihma më e madhe mund të vijë nga IA, e cila mund t'i njohë automatikisht ato sinjale që i paraprijnë një tërmeti duke analizuar të dhënat e lidhura me lëvizjen e pllakave tektonike apo çarjeve. Zbulimi i madh vjen nga mësimi automatik i makinave, një metodë e pambikëqyrur, pa udhëzime të paracaktuara, që identifikon ngjashmëri ose struktura të ngjashme në të dhënat që i paraprijnë një tërmeti. Një ekip shkencëtarësh nxori të gjitha të dhënat nga pesë tërmetet më të rëndësishme në të gjithë botën dhe i gjithë ky informacion u përpunua nga algoritmi, i cili katalogoi dhe klasifikoi të dhënat, duke i grupuar ato në familje të ndryshme. Sistemi ishte në gjendje të kuptonte se me cilat të dhëna të punonte, cilat të kërkonte dhe, shkurt, cilat ndryshime të të dhënave i paraprinë tërmetit. Kjo ende nuk ndihmon në parashikimin e tërmeteve, por nxjerr në pah se cilët tregues duhet të përdoren për një studim sistematik të parashikimit të mundshëm të tërmeteve. Sipas studiuesve, analiza e inteligjencës artificiale, duke përdorur teknika shumë të përparuara përpunimi, mund të përmirësojë kuptimin e fenomeneve fizike që i paraprijnë tërmeteve.