Ajo që po njihet si Kupola e të Nxehtit, po përvëlon pjesë të gjera në SHBA dhe Kanada dhe i ka marrë jetën deri më tani të paktën 500 personave. Viktimat e të nxehtit të paprecedentë janë regjistruar në kanada por edhe në Oregon dhe Uashington, ndërsa temperatura ka shënuar mbi 47 gradë celcius duke e bërë rajonin edhe më të nxehtë se Lugina e Vdekjes. Zyrtarët në Kolumbian Britanike në Kanada, po hetojnë nëse i nxehti është shkaktar i të paktën 486 viktimave të papritura nga e premtja deri të mërkurën. Normalisht, rreth 165 persona humbin jetën në provincën kanadaze në një periudhë pesë ditore thonë zyrtarët, por bilanci i regjistruar këto ditë, është disa herë më i lartë. E sikur të mos mjaftonte kjo, zjarret që shpërthyen cuan në evakuimin e fshatit kanadez Lytton, një ditë pasi ai regjistroi temperaturën më të lartë në histori, 49.6 gradë celcius. Zyrtarët lokalë urdhëruan banorët të largoheshin dhe thanë se zjarri u përhap në Lytton në vetëm 15 minuta. Në oregon, në shtetet e bashkuara, zyrtarët thanë se më shumë se 60 viktima janë shënuar nga i nxehti i madh. Mbi 10 viktima janë regjistruar edhe në Uashington nga vala e të nxehtit ndërkohë që shifra, sipas zyrtarëve pritet të rritet akoma më shumë. Vala e të nxehtit është shkaktuar nga ajo që meteorologët e kanë cilësuar një kupolë presioni të lartë mbi pjesën veriperëndimore të kontinentit të amerikës veriore dhe është përkeqësuar nga ndryshimet e klimës të shkaktuara nga dora e njeriut.