Presidenti Joe Biden shkarkoi të premten komisionerin e Administratës së Sigurimeve Shoqërore pasi zyrtari refuzoi të jepte dorëheqjen, ndërkohë që pranoi dorëheqjen e zëvendës komisionerit të kësaj agjencie, tha Shtëpia e Bardhë. Presidenti Biden i kërkoi Komisionerit Andrew Saul të jepte dorëheqjen dhe ai u shkarkua pasi refuzoi kërkesën e presidentit demokrat, tha një zyrtar i Shtëpisë së Bardhë. Nënkomisioneri David Black ra dakord të japë dorëheqjen, tha zyrtari, i cili foli në kushte anonimiteti. Të dy zyrtarët ishin vendosur në këto poste nën ish Presidentin Donald Trump. Presidenti Biden emëroi Kilolo Kijakazi-n si komisionere të përkohshme, ndërsa administrata kërkon një kandidat për komisioner dhe nënkomisioner të përhershëm. Zonja Kijakazi aktualisht është nënkomisioner për pensionet dhe politikën për aftësitë e kufizuar në Administratën e Sigurimeve Shoqërore. Largimi i zotit Saul erdhi pas një opinioni ligjor të hartuar nga Departamenti i Drejtësisë që arrin në përfundimin se ai mund të shkarkohej, pavarësisht një rregulloreje që thotë se zyrtari mund të pushohej nga puna vetëm për neglizhim të detyrave të tij ose keqpërdorim të postit. Opinioni, i hartuar me kërkesë të Shtëpisë së Bardhë, arriti në përfundimin se një rivlerësim bazuar në një vendim të fundit të Gjykatës së Lartë do të thoshte se zoti Saul mund të shkarkohej nga presidenti nëse ai dëshironte ta bënte një gjë të tillë.